Os tres mellores alumnos ou alumnas de cada distrito universitario de Galicia (Santiago, A Coruña e Vigo) que participaron na XXXIV Olimpíada Galega de Química 2017 recibiron o pasado venres, 28 de abril, na Facultade de Química de Santiago de Compostela os seus diplomas e galardóns de mans do secretario xeral de Universidades, José Alberto Díez de Castro; da decana da Facultade de Química da USC, Pilar Bermejo; da vicedecana da Facultade de Ciencias da Universidade dá Coruña, María Elisa Beceiro, e do presidente da Asociación de Químicos de Galicia, Manuel Rodríguez Méndez. Os case 100 alumnos e alumnas de 24 centros educativos Galicia que participaron na olimpíada tamén recibiron o seu diploma. Todos participaron nunha xornada en Compostela sobre a Química para fomentar e espertar as vocacións pola química entre as novas xeracións.
O presidente da Asociación de Químicos de Galicia e tamén decano do Colexio Oficial de Químicos de Galicia, Manuel Rodríguez Méndez, destacou que a Olimpíada Galega de Química, ten como meta ?espertar o interese pola química, fomentar as vocacións por esta ciencia entre os máis novos, destacar a importancia da química en todo o que nos rodea e proxectar o seu protagonismo en toda a sociedade galega?. Agradeceu a participación do centenar de estudantes na XXXIV Olimpíada de Química de Galicia e animoulles a ?estudar química? na Universidade.
Os mellores. O primeiro posto na demarcación da USC foi para Francisco José Pérez Pérez, do IES Rosalía de Castro de Santiago. E os lugares segundo e terceiro foron a parar por esta orde a alumnos do Colexio Manuel Peleteiro: Francisco Garrido Enjamio e Eduardo Mata Ewy. O primeiro posto na demarcación da Coruña foi para un alumno do Colexio Obradoiro (A Coruña). Enrique Anzola Leis foi o campión. E Inés Díaz-Tejeiro Rodríguez, do Colexio Santa María del Mar, a subcampioa. O terceiro posto conseguiuno Carlos Pernas Fraguela, do IES Cabo Ortegal (Cariño). O primeiro posto da demarcación da Universidade de Vigo foi para Javier Curral Sertal, alumno do IES Álvaro Cunqueiro (Vigo). O segundo lugar e terceiro lugar ocúpano dúas alumnas do IES do Castro, tamén de Vigo: Andrea Igrexas e Irena Sánchez Sanz.
